- 773 -

1453. Mai 16. Wien.

Lasslaw von gots gnaden zu Hungern, zu Behem, Dalmatien, Croatien etc. kunig, herczog zu Oesterreich vnd marggraue zu Merhern etc.

Getrewn lieben. Wir haben vnser mann vnsers landes Lignicz vnd Goltperg vnd die erbern weisen ratmann vnd burger gemannlich zu Legnicz vnser getrewn lieben zusame verpunden vnd veraynet, ob sy yemand bekriegen vnd von vns vnd vnser cron zu Behem bringen wolt, daz sy aneinander hulff vnd beistand tun vnd sich solhs weren vnd widerhaben mugen, als vnser brief, darumb gegeben, innehalden vnd ew die furbringen wirden, begern wir mit vleiss vnd emphelhen ew ernstlich, daz ir die mann vnsers landes Goltperg zu samm ruffet, in dieselben vnser brief lesen lasset vnd sy von vnsern wegen pittet vnd daran weiset, als pesst ir mugt, daz sy derselben vnser ordnung geuolgig sein vnd sich mit den vorgenanten vnsern burgern, ratmannen vnd gemein zu Legnicz veraynen vnd der nachgeen. Daran tut ir vns gut geuallen vnd wir wellen das gen ew vnd in genedicleich erkennen. Geben zu Wienn an mitichen vor dem heiligen Phingst tag. Anno domini etc. LIII° vnserr kronung vnsers reichs des Hungrischen etc. im drewczehenden jare.

Rückaufschrift: Vnsern getrewn lieben Henncztschil von Alczemal, Petern Schellendorffer vnd Heinczen Taugstorf.

O. d. St L. No. 419.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866